Din il-ġimgħa fakkarna mument importanti fl-istorja ta’ pajjiżna – Jum il-Ħelsien. Jum li bidel id-destin ta’ ġensna: it-tmiem tal-ħakma, il-ħelsien veru ta’ Malta mill-kolonjaliżmu.
Għax dak li ġara fil-31 ta’ Marzu tal-1979 ma kienx biss bidla, jew kisba simbolika. Kien il-mument fejn Malta, għal-ewwel darba fl-istorja tagħha, ħadet f’idejha d-destin tagħha. Mingħajr suldati barranin. Mingħajr kontroll jew indħil ta’ forzi esterni. Rajna f’idejna. Pajjiż sovran, li jimxi bil-pass tiegħu, fuq l-għażliet tiegħu.
Jum il-Ħelsien huwa wkoll tifkira li l-libertà li ngħixu llum ma ġietx b’kumbinazzjoni. Ġiet b’sagrifiċċji. B’determinazzjoni. B’poplu li għaraf jiflaħ għat-taqlib, jgħaddi minn mumenti diffiċli, u joħroġ minnhom aktar b’saħħtu – bħala nazzjon wieħed.
U għalhekk, kien ta’ dispjaċir kbir li l-Kap tal-Oppożizzjoni għażel li ma jattendix għaċ-ċeremonja uffiċjali ta’ dan il-jum storiku. Minflok jgħaqqad, għażel li jifred.
Dan kollu juri l-vera wiċċ ta’ min illum ħakem u jiġbed l-ispag fil-PN – il-fazzjoni estremista li taħseb li għandha xi dritt divin li tmexxi. Li tagħha biss tajjeb. L-istess mentalità li wasslet lil Bernard Grech biex jgħid li ‘meta jkun barra, jistħi jgħid li hu Malti.’
Aħna lil pajjiżna ma niċħduh qatt. Irrispettivament mill-fehmiet politiċi diversi, aħna kburin bil-kisbiet kollha ta’ missirijietna.
Li ma naqblux fuq ċerti temi politiċi huwa normalissimu u tajjeb għal demokrazija sana.
Imma fl-aħħar mill-aħħar ngħarfu li aħna lkoll aħwa Maltin u l-istorja ta’ ġensa għandha tgħaqqadna u mhux tifridna.
Mumenti bħal dawn ifakkruna li Jum il-Ħelsien mhux episodju tal-imgħoddi, imma kisba li rridu naħdmu għaliha kuljum. Irridu nibqgħu ħielsa mill-politika tal-mibegħda, miċ-ċensura, mill-klassiżmu, mill-inugwaljanzi, mid-diskriminazzjoni, u minn kull forma ġdida ta’ ħakma bħad-diżinformazzjoni u l-fake news.
Għax il-vera ħelsien ma jiqafx fl-istorja. Il-vera ħelsien jgħix fina – f’dak li nagħmlu, fil-mod kif immexxu, u fl-għażliet li nieħdu flimkien.
Aħna rridu pajjiż li jibqa’ miexi ’l quddiem, fuq il-valuri tal-verità, il-ġustizzja u l-għaqda.
U f’dan l-ispirtu, inġorru l-ħolma ta’ Mintoff f’qalbna, f’moħħna u f’xogħolna ta’ kuljum fil-Parlament Ewropew – fejn l-interess ta’ Malta għalina jibqa’ dejjem l-ewwel u qabel kollox.