Fl-2022, ir-Russja invadiet l-Ukrajna. Dan huwa fatt. Iżda l-President Amerikan Donald Trump jargumenta li l-Punent u n-NATO pprovokaw lir-Russja b’espansjoni lejn il-Lvant. Fil-passat, saru wegħdi li n-NATO ma tersaqx lejn ir-Russja, iżda dawn il-wegħdi ma nżammewx.

Dan jiġġustifika gwerra? Dażgur li le.

Iżda setgħet kienet evitata kieku l-ftehim oriġinali nżamm? Possibbli.

Issa għandna sitwazzjoni fejn l-Amerka waqfet tagħti l-armamenti lill-Ukreni.

L-Ewropa, anke jekk trid timla l-vojt li se tħalli l-Amerka, għandha bżonn snin sabiex taġġorna t-teknoloġija militari għal dik Amerikana.

Madanakollu, jidher li l-Ewropa qed tibqa’ tinsisti li iddoqq it-tnabar tal-gwerra.

Sadanittant, ir-Russja għandha 20% tal-Ukrajna u Putin irid aktar.

L-Ukrajna tista’ tirbaħ lura dik l-art mingħajr l-appoġġ Amerikan? Diffiċli. Anzi jaf anke taqa’ lura fil-frontline.

Jista’ jintlaħaq ftehim ta’ paċi? Jista’ jkun. Iżda n-narrattiva fl-Ewropa mhux l’hemm qed timbotta.

Jekk l-Ewropa trid tevita li ssir irrelevanti u tkun superpotenza u tassigura l-interessi tagħha – kif ukoll is-sigurtà tagħha mingħajr dipendenza fuq l-Amerika – trid tieħu d-deċiżjonijiet b’aktar għaqal u mhux tinqabad f’narrattivi vojta kif ġara issa… fejn daħlet ġo ħajt.

Wara kollox kien prevedibbli li Trump se jieħu l-pożizzjoni li ħa u minkejja dan, ħafna ħaduha b’sorpriża.

F’dan kollu l-pożizzjoni ta’ Malta hija korretta.

Ma nistgħux naċċettaw Ewropa rasha fir-ramel li tibqa’ titfa’ l-flus fil-għama, bla pjan ċar. Speċjalment meta issa Putin jaf iżid l-aggressività tiegħu minħabba li l-Ukrajna se tkun mingħajr armamenti Amerikani.

Jekk trid tittieħed bis-serjetà, l-Ewropa trid tibda taħseb b’mod strateġiku u mhux tintilef f’narrattivi li ma jwaslu imkien.