Il-Malti jgħid li l-giddieb għomru qasir u li ż-żejt dejjem jitla’ f’wiċċ l-ilma. U hekk ġara din il-ġimgħa, hekk kif għal darb’oħra ħareġ fid-deher il-qerq tal-Partit Nazzjonalista u ċertu esponenti fi ħdanu li għalihom, l-interess u l-avvanz personali jiġi qabel l-interess nazzjonali. Ixerrdu l-falz, għax il-verità tweġġa.
Kif għamel Peter Agius li b’arroganza u b’diżrispett lejn l-intelliġenza tal-Maltin, ċaħad li f’Lulju li għadda vvota favur riżoluzzjoni li titlob lill-Membri Stati tal-Unjoni Ewropea joħorġu 0.25% tal-ġid nazzjonali fuq l-armamenti. Iżda l-voti uffiċjali juru li fil-verità vvota favur. Dan ifisser li skont Peter u l-PN, Malta għandha tonfoq madwar €52 miljun fis-sena fuq armi u missili, flus li ġejjin direttament mill-bwiet tal-Maltin.
Dan huwa fatt, mhux opinjoni. Fatt li ma jista’ jmerih ħadd, u li l-ebda kampanja ta’ miżinformazzjoni ddisprata ma tista’ tħassar.
U jekk dan ma kienx biżżejjed, dil-ġimgħa stess fil-Parlament Ewropew kellna quddiemna riżoluzzjoni oħra li ttenni s-sejħa għal infiq dirett mill-baġits nazzjonali għall-armamenti fl-Ukrajna. Dan kien iċ-ċans tal-Partit Nazzjonalista biex jiddefendi n-newtralità ta’ Malta fil-Parlament Ewropew. Imma x’għamlu? Astjenew. Qagħdu lura. M’għandhomx il-kuraġġ li jieħdu pożizzjoni ċara favur il-prinċipji fundamentali ta’ pajjiżna.
Malta Mhux Se Tonfoq Ewro Għall-Gwerra
Id-differenza bejn il-Partit Laburista u l-PN qatt ma kienet ċara daqs illum. Il-Prim Ministru Robert Abela kien ċar u inekwivoku: Malta mhux se tibgħat suldati, mhux se tiffinanzja gwerra u mhux se toħroġ ċenteżmu għax-xiri tal-armi.
Il-PN, bil-maqlub, irid Malta tħallas il-prezz tal-ġlied ta’ ħaddieħor. Il-PN huwa favur il-Forzi Armati Ewropej, addio n-newtralità u n-non-alinjament ta’ pajjiżna. Inutli jipprovaw jgħattu u jċajpru l-verità. F’Malta taparsi jiddefendu n-newtralità, imma meta jaslu Brussell jivvutaw favur infiq fuq il-gwerra jew inkella jaħarbu milli jieħdu pożizzjoni ċara.
Ir-rebbieħa u t-telliefa ta’ gwerra bla tmiem
Ejja nkunu ċari dwar x’inhu jiġri fl-Ewropa.
L-UE qed tipproponi €800 biljun f’armamenti, flus li sejrin direttament lejn il-fabbriki tal-armi fil-Ġermanja, Franza, l-Italja u l-Isvezja fost oħrajn. Negozju tajjeb għal min se jiekol minnu, iżda tragedja għal dawk li jkomplu jmutu fil-kunflitt.
S’issa, aktar minn 200,000 ruħ tilfu ħajjithom fil-gwerra bejn ir-Russja u l-Ukrajna. Medja ta’ 180 mewt kuljum – ħafna minnhom żgħażagħ li ma kellhom xejn x’jaħtu. Il-verità li ħadd ma jgħid hija li l-Ukrajna, mingħajr it-teknoloġija militari Amerikana, aktar hemm ċans li titlef Iżjed territorju milli tirbaħ lura. Għalhekk nibqa’ ntenni li flok iddoqq it-tnabar tal-gwerra, l-Ewropa għandha tara kif tkun madwar il-mejda tat-taħdidiet dwar il-waqfien mill-ġlied, u mhux spiċċajna iżolati mid-diskussjoni dwar il-kontinent tagħna stess.
Il-PN Jikkomprometti mal-Interess Nazzjonali
Il-PN mhux biss ivvota favur li Malta tonfoq flus fuq l-armamenti, iżda huwa favur ukoll l-ħolqien ta’ forzi armati Ewropej. Dan ifisser li Malta titlef saħansitra aktar mill-kontroll tagħha fuq id-deċiżjonijiet relatati mas-sigurtá u d-difiża.
Il-Partit Laburista kien u jibqa’ konsistenti: Malta hija u tibqa’ newtrali.
Jekk il-PN jrid li Malta tinvolvi ruħha f’gwerra li ma tistax tintrebaħ, jagħmlu huma.
Magħna tafu fejn qegħdin. Tafu li mal-interess nazzjonali, aħna ma nilgħabux. Għax għalina, Malta kienet u tibqa’ l-ewwel u qabel kollox, dejjem u kullimkien.